home
user-header
Баанньык "абааhыта" 😁😁😁 (күлүүлээх кэпсээн)
3 августа 2016 г., 02:01 462

Арай биирдэ Наташа көрүдьүөскэ түбэһэ сылдьыбыт, ол туһунан маннык кэпсиир:

-- Былырыын саас биһиги даачатааҕы кооперативпытыгар сайыҥҥы куораттааҕы водопровод уута кэлбитигэр, биһиги дьиэ кэргэн таҥас сууйар автомат массыынаны атыылаһарга соруннубут. Кэргэмминээн биир биллэр техника гипермаркетыгар кыһаллан-мүһэллэн таламмыт, анал акциянан улахан чэпчэтиилээх LG фирма таҥас сууйаалкатын ыллыбыт. Доставкаҕа экономиялаан бэйэбит массыынабытынан складтан тиэйэн даачабытыгар аҕаллыбыт. Ол иннинэ куораттааҕы квартирабытыгар ийэлээх аҕам 90-с сыллар бүтүүтүгэр, били кризис иннинэ аҕай, BOSCH диэн германскай таҥас сууйар автомат массыынканы аттыылаһан турардаахтар. Онтукабыт баччааҥҥы диэри үлэлиир. Онон биһиги, автомат сууйаалканы хас эмэ сыл туһанан кэлбит дьон быһыытынан, уһуну киэҥи толкуйдаабакка, туспа турар баанньыкка киллэрэн, водопровокка холбоотубут, сливын септикка анньан кэбистибит. Оҕолорбут үөрдүлэр аҕай, уолум тиийэн кирдээх таҥаһын саҥа сууйаалкаҕа уган кэбистэ Дьэ, мин LG-бын холбоотум. Массыына таҥаһы сууйбутунан барда. Саҥа ситиһиилэммит, даачаҕа автомат массыыҥкаламмыт дьиэ кэргэн ийэтин быһыытынан, дьоһуннаахтык туттаммын дьиэбэр киирдим. Арай, биир чаас курдугунан, оҕолорум ыксаабыт аҕай көрүҥнээх күүлэҕэ сүүрэн киирдилэр: "Мама, баран көр эрэ стиралканы, баанньык ааныгар тиийэ ыстаҥалыыр, дьиикэй сэп быһыылаах!", диэн соһуттулар. Оо, туох буоллаҕай диэммин кэргэммин ыҥырдым, бары делегациялыы дьоhуннаахтык баанньыкка бардыбыт. Арай чугаһаан истэхпитинэ иҥин-араас кутталлаах тыас-уус иһиллиннэ. Ким эрэ ыстаҥалыы-ыстаҥалыы улуйа-улуйа: "Эта банька слишком тесна для меня! Выпустите меня на волю!", дии-дии арҕастыырыгар дылы этэ. Хайдах хайдаҕый диэт, папабыт ааны аста. Көрбүппүүт... Туох буолуой? Саҥа LG-быт дырылыы-дырылыы, ис иһиттэн илибирээн, сахсыллан, бааньык ортотугар ойуоккалыы аҕай турар эбит! Тыаһа диибин диэн! Көтөн эрэр самолет курдук, гууу-гуу диэн ис дууһаҕын, сүрэххин уонна да атын органнаргын дьигиҥнэтэр тыас эбээт, доҕоттоор.

Кэргэним Байбал, күүлэйдии барбыт массыынканы ылан миэстэтигэр илдьэн биэрдэ. Сууйаалкабыт сүгүн турбата, илибирии-салыбырыы хамнаныы бөҕөтө. Хата өр буолбакка уутун тохто уонна араҕыста. Уолбут таҥаһа бэртээхэйдик ырааһырбыт, ыгыллыбыт этэ. Мин таҥас ыйыы бардым, Байбал массыынаны одуулуу хаалла.

Сотору соҕус иккистээн таҥас уктубут. Массыынабыт син биир баанньыгы биир гына кэрийэр. Туох ааттаах маҕаһыыный, явно бракованнай серияны акциянан чэпчэтэн атыылаабыттар, сараһыттар, диэн биһиги кэмсинии-кыыһырыы бөҕөбүт. Арай эрим массыынка кэннин көрбүтэ, түөрт болтик өһүллэн тахсаннар түһээри турар эбиттэр. "Оо, дьэ, стиралкабыт отой да ыһыллан эрэр буолбат дуо?!", -- диэт кэргэним ол болтиктары отвертканан эрийэн биэрдэ уонна массыынканы үөһэнэн-алларанан маһынан тула өртүнэн рама оҥорон истиэнэҕэ тоһоҕолоон хам саайан кэбистэ. Мас рамалаах массыынабыт уоскуйбукка дылы буолла эрээри, ол кэннинээҕи болтиктарбыт сотору-сотору тулла тураллара уонна истиэнэҕэ рамабытын тутан турар тоһоҕолору стирка аайы бөҕөргөтөн ыпсаран биэрэрбит. Байбал кыһыйбыт санааьыгар, стиралканы: "Ээ, бээ, ити болтиктаргын сваркалаан кэбиһиэм ээ", диэн куттуура.

Ити курдук ый аҥаара ааста. Биир үтүө күн докумуон сааһылыы сылдьан, таҥас сууйар массыынабыт инструкциятын булан ыллым. Арыйбытым, арай! Олох даҕаны били болтиктары стиралканы холбуох иннинэ киэр өһүлэн кэбиһиэхтээх эбиппит! Перед установкой удалить транспортировочные болты, см. рисунок 1. диэн хара улахан буукубанан сурулла аҕай сылдьар эбит! Оо, буолар да эбит, өйдөнөн кэлэн өһүллэхпит.

Ол да буоллар, болтиктардаах туһанаммыт, стиралкабытын кэбирэппит эбиппит, сотору соҕус кини алдьаммыта. Итинник түбэлтэҕэ гарантия хаарчахтаммат эбит, ремонун харчыга оҥорторбуппут. Баагын тоҕо охсон кэбиспит, ол илгистэ сылдьан.

Онон, хайаан да бытовой техника инструкциятын ааҕар буолун

Избранное
  • 5 августа 2016 г., 01:26
    САБ   Пожаловаться

    Мин эмиэ оннук холбуу сылдьыбытым, онтон кыhал5аттан инструкциятын аа5ан болталарын устубутум

Чтобы оставить комментарий, вам нужно авторизоваться
с помощью аккаунта в соц.сети
Включите премодерацию комментариев
Все комментарии к этому посту будут опубликованы только после вашего подтверждения. Подробнее о премодерации