home
user-header

                        
                        
Сахалыы... муус устар
9 апреля 2018 г., 18:28 315

Баран иhэр суолум...


Мин ол күн икки уол оҕолорбун илдьэ Иерусалимҥа баран испитим. Улахан уолум: “Аҕаа, аҕаа! Биһиги онно тугу гынабытый? Син биир тугу да өйдөөбөппүт ээ?” – дии-дии илиибиттэн тардыалыыр. Мин кинилэргэ Моисей уонна Авраам туһунан кэпсии-кэпсии: “Кытаатын, барааҥҥыт оҕотун сүтэримэҥ, көрөн иһин” – диэтим.

Куоракка киирэн баран соһуйан ах баран хааллыбыт, ханна да бырааһынньык курдук буолбатах, үөрүү-көтүү оннутугар кыыһырбыт хаһыылар иһиллэллэр, кими эрэ ууллуссанан үөҕэ-үөҕэ илдьэн иһэллэрэ көстөр. Мин уолаттарбын күүскэ илиилэриттэн ылан куораттан куотар аакка бардым да, элбэх дьон иһигэр киирэн хаалан, сүүрээн курдук барсан хааллыбыт. 

Оо, тоҕо манна түбэспитим буолла? Тоҕо оруобуна манна, бу кэмҥэ түбэһэ кэлбитим буолла? Сүрэҕим түөһүм иһигэр “Тоҕо мин” диэбиттии ытырбахтаан ыла-ыла өрө мөхсөр, хаһытыан баҕарар да, туохтан эрэ тутуллар...

... үс киһини Рим саллааттара кириэскэ тиирээри илдьэн иһэллэр эбит, норуот эмиэ субу түһүөх курдук, илиилэринэн далбаатыы-далбаатыы “Тиирэргэ! Тиирэргэ!” диэн хаһытыыллар. 

Көрдөхпүнэ бастакы киһи олус куттаммыт сирэйдээх. “Аһынын даа, ыытын даа, мин буруйум суох!” дии-дии умнаһыт курдук илиитин туттан нэһиилэ үтүрүллэн хааман иһээхтиир эбит.

Иккис киһи олох атыннык көрөр-истэр, сиэмэх кыыл курдук, харахтарыттан уот чаҕылыҥныыр, кыйыттыбытын, абарбытын тулуйбакка, саҥарбакка силлиир эрэ.

Онтон үһүс... наһаа да киһи билбэт гына кырбаабыттар. Көрбүппэр харахтарым итэҕэйбэтилэр! Ама маннык дьаабылыахха сөп дуо? Хайдах манныгы киһи тулуйар? Испэр туох эрэ быстыбытын курдук ыарыылаах буолла... Кини сүгэн иһэр кириэһэ барыта хаан буолбут этэ, хааман иһэр суола хаанынан бэлиэтэнэрэ... оо, айыккабыаан, ... олох дөйөн баран турдахпына эмискэ Рим саллаата илиибиттэн харбаан ылан: “Бу кириэһи эн илт!” – диэн хамаандалаата! Маҥнай өйдөөбөккө турдум, онтон аккаастана сатаатым да, саллаат батаһынан куттаата... кириэһи сүгэн баран истэхпинэ Кини хаана иэдэспэр сүүрэн түһэрэ, ыар да сүгэһэр этэ! оттон Кини саҥата суох, сиэртибэҕэ барар бараан оҕотун курдук баран испитэ.

Кириэс анныгар, ким барарын-кэлэрин да көрбөккө, тобуктаан ис-испиттэн ытыы олоробун. Төбөм иһигэр: “Бырастыы гын, бырастыы гын” – эрэ диэн баар. Ол олордохпуна, икки илиибиттэн уолаттарым, чыычаахтарым тутан ыллылар, туруорар аакка бардылар. Улаханым: “Аҕаа, бырастыы гын, биһиги бараан оҕотун куоттаран кэбистибит” – диэн ытыыр саҥата иһилиннэ – “Аны хайдах аньыыбытын суох гынабыт?”. Мин өй ылан кинилэри кууһан ыллым, кырам “Биһиги тугу да өйдөөбөтүбүт, туох буолла, уонна туохха бараан оҕотун аҕалбыппытый?” – диэтэ. Мин харахтарын уутун сото-сото: “Тоойуом, сиэртибэ буолбут Агнец, бу баар, барыбыт аньыыбыт иһин” -  диэтим...

#Сахалыы

 

Избранное
Чтобы оставить комментарий, вам нужно авторизоваться
с помощью аккаунта в соц.сети
Включите премодерацию комментариев
Все комментарии к этому посту будут опубликованы только после вашего подтверждения. Подробнее о премодерации