home
user-header
Кэпсээним бүтүүтэ
13 сентября 2016 г., 23:49 478

 

 

Сардааналаах Куоста бу түгэнтэн ыла олохторун туһунан кэпсээн да тугу кэпсиэхпиний? Киһиттэн уратытык таптыахха сөбө дуу, суоҕа дуу. Арааһа, таптал барыта киһиэхэ барытыгар атылыы буолуо. Ол гынан баран, тустаах дьон санаатыгар, кинилэр эрэ тапталлара атыттар киэннэриттэн ураты, сырдык-ыраас, кимиэхэ да хатыламмат курдук көстөр. Дьон дьолуттан ураты дьол баара дуу, суоҕа дуу? Ол эрээри, Сардааналаах Куоста дьоллоро, кимиэниттэн да атын, дьикти үчүгэй.


Тапталлааххын кытта сып-сылаастык, сып-сымнаҕастык ыгыта куустуһан сытартан ордук туох баар буолуой? Биир үтүө сарсыарда Куоста уһуктан кэлбитэ, Сардааната киниэхэ сыстыаҕынан сыстан баран утуйан буккуруу сытара. Кэмниэ кэнэҕэс кыыс уһугунна быһыылаах, ону сэрэйэн уол сүүһүттэн сыллаан ылла:

- Сардаанчык, тугу эрэ кэпсиибин дуо?

Кыыс кэпсээ да кэпсээмэ, онтон биһиги дьолбут көҕүрүө суоҕа диэбиттии, хайдах сыппытын курдук хамсаабакка сытта.

- Били, ол күнү өйдүүгүн дуо? Өрүс ортотугар устан истэхпинэ ыҥырбыккын өйдүүгүн? Мин сибилигин ол күнү санаан кэллим.

Сардаана, уол кинини күүскэ да күүскэ таптыырын туһунан этээри гынна дии санаан, Костятын иэдэһиттэн уураан ылла.

Тохтуу түһэн баран, уол этээри гыммытын салҕаата:

- Ити иннигэр, өтөххө мин биир дьиктини көрбүтүм.

- Ол тугу?

- Биир кырдьаҕас эмээхсин сырсыбыта, онтон куотан тыыбар нэһиилэ олорон куоппутум.

- Ханнык эмээхсин? Тугу-тугу кэпсээн бардыҥ? – кыыс суорҕанын бүрүнэн олорунан кэбиспитэ уонна уолун сирэйин-хараҕын болҕойон көрбүтэ. Куоста алҕас быктаран кэбистим дуу, дии санаан ылбыта. Ол да буоллар, түбэлтэтин хайдах баарынан кэпсээн биэрэргэ санаммыта.

Уол кэпсээнин болҕойон истэн баран, кыыс тугу эрэ санаан кэлбиттии, өр саҥата суох олоро түспүтэ уонна эппитэ:

- Ити мин эһээлээх эбээм өтөхтөрө ээ. Итинтэн чугас көмүллэ сыталлар... Арай? Арай, эйиэхэ мин эбээм кэлэ сылдьыбыт буоллун?

- Эс! Өлбүтэ ырааппыт киһи дуо? Уонна тоҕо «сиэҕим» дии-дии сырсыай? Мин туох да куһаҕаны оҥорботоҕум ээ.

Куоста эмискэ тугу эрэ саныы түспүттүү чочумча сыта түспүтэ уонна:

- «Сиэҕим» буолбакка «сиэним» диэбит эбит! Ол аата, эйигин эппит дуо? Сардаана, арааһа эн эбээҥ миэхэ эн тускунан этэ сатаабыт быһыылаах! Ону өйдөөбөтөхпүн,  -диэбитэ.

Сардаана Костяны, ийэ оҕотун имэрийэрин кэриэтэ төбөтүттэн сымнаҕастык имэрийэн ылаат сүүһүттэн сыллаан ылбыта:

- Акаарычаан, олус бэрткэ өйдөөбүккүн буолбаат? Онтон атын бу курдук кимтэн да ордук дьоллоохтук олоруо этибит дуо? Эбээбин биирдэ да көрбөтөҕүм. Ийэм кэпсииринэн, дьоҥҥо мэлдьи көмөлөһө сатыы, утүөнү баҕара эрэ сылдьара үһү. Онон эйигин мээнэҕэ куттаабатах буолуохтаах. Уйулҕаҕын хамсатан майгыгын сымната түстэ ини? – диэн күлүү оонньуу курдук быһааран кэбиспитэ.

Избранное
Чтобы оставить комментарий, вам нужно авторизоваться или зарегистрироваться
Включите премодерацию комментариев
Все комментарии к этому посту будут опубликованы только после вашего подтверждения. Подробнее о премодерации
Обратная связь