home
user-header
Суруллубут суоруллубат
16 апреля 2019 г., 20:07 93

Былыр инньэ дииллэрэ. Онтон аныгы интернет үйэтигэр, бу тыллар суолталара өссө улааппыт эбит. Ол курдук, интернет ситимин улаҕатыттан, уон сыл анараа өттүгэр суруйбуппун булан ааҕан соһуйдум. Билигин ити курдук суруйарым саарбах. Арыый эдэр уонна ити кэмҥэ соҕотох да буоллар ааҕааччылаах буолан,  иэйиим киирэн хоһуйдаҕым буолуо. Ааҕааччы баара элбэҕи быһаарбыт да буолуон сөп... 


 

 

Уол оҕо кырачаан сүрэҕэр оспот баас хаалларан барбытыҥ… Бабытыҥ ыраах да ыраах… Ол дойдуга, мин санаам да тиийбэт курдуга.

Аан маҥнай, бэйэҥ да билбэккэ миэхэҕэ хаалларбыт бааскыттан сыккыстаан кыһыл хаан тохтоло суох сүүрэрэ. Эппинэн-сиимминэн хас биирдии муннугу таарыйан эргийэр тымырым, эн суолгар иҥнэн өһөҕүнэн ытыыра. Сыыйа ол баас, тиит мас сымалата сүгэнэн охсуллубут суолу сыыйа бүөлүүрүн кэриэтэ, хатырыгынан бүрүллүбүтэ. Ардыгар алҕаска ол ону таарыйан кэбиһэн, эн илдьэ барбыт сүрэҕим сорҕотун суохтатан, мин дууһам иккистээн ытыыра.

Сүппэт баас эмчитэ кэм-кэрдии, эн сүдү да күүстээххин, хараабат кыахтааххын. Сороҕор, өлөрдүү бааһырбыт киһини атаҕар туруорар ахсаабат аптааххын. Сотору кэминэн эн суолуҥ хаанынан ытатар күннэрин ахсаана аҕыйаан, устунан аһаҕас баас оҥойор оннута бүрүллэн сүппүтэ. Хаалбыта, ЭН СУОЛУҤ… Эн суолгун, олохпор бастакы тырымнас дьол кыымын сүрэхпэр чокуурдуу сахпыккын кэриэстээн, бүөбэйдээн мин илдьэ сылдьабын. Ыарахан санаалар мин куппун баттааннар, өй-санаа кулута оҥорор күннэрэ бу тирээн кэллэллэр, эн суолгун бигээммин дууһабын саататан ыларым.

Билэрим, эн хаттаан эргийэн мин уйан сүрэхпэр уйаҕын иккиһин туппаккын, кый ыраах сүрэҕим сорҕотун быһыта тардаҥҥын барбыккын төннөрө, миэхэҕэ иккистээн эн тиийэн кэлбэккин. Ол иһин бар дьоммор эппэккэ, эн суолгар сөптөөҕү мин сэмээр көрдүүрүм, сүрэхпэр абырах гынаары эйиэхэ маарынныыр кыысчааны көрдүүрүм.

Остуоруйа дойдутун кэрэчээн кыысчаанын атаҕын суолугар тэннээҕи көрдөөбүт уолчааны санатан аастаҕым бу кэмҥэ. Хаста да сыыстаран, мин кутум эмчитэ бу кэллэ диэбитим, минньигэс-минньигэстик ньүөлүйэн кэлээччи сүрэхпэр саһыарбыт эн суолгар баппакка, үүрүллэн тахсыбыт кыргыттар элбэхтэр.

Көрдөөбүт, күлүмнүүр көмүһү сир-дойду хонноҕун барытын кэрийэн даҕаны булааччы, баҕарбыт түгэҕэ биллибэт киэҥ да киэҥ баҕата томточчу туолааччы. Ол курдук мин эмиэ, оҕочоос сүрэхпэр хаалларбыт эн киэпкэр сөптөөҕү, өр да өр көрдөөммүн буламмын, үөрүү-дьол үрдүгэр бу күҥҥэ таҕыстым, сүрэҕим быстыбыт сорҕотун чөлүгэр түһэрэн буор куппун уоскуттум. Эн суолгар сөптөөҕү элбэхтэн табатык тайанан таллым мин. Бу күнтэн ылата мин дьиҥнээх олоҕум айанын аартыга салҕанар, киэҥ да киэҥ сып-сырдык уһун суол иннибэр дыргыйар.

Бу туран дьэ биллим, бу орто дойдуга айыллан кэлээччи хайаан да сэрэнэ, долгуйа аргыыйдык саҥарар биир тылын суолтатын. Ол ону кистээммин эйиэхэ бу кэпсээн гынаммын хоһуйан суруйдум.

Избранное
Чтобы оставить комментарий, вам нужно авторизоваться или зарегистрироваться
Включите премодерацию комментариев
Все комментарии к этому посту будут опубликованы только после вашего подтверждения. Подробнее о премодерации
Обратная связь