home
user-header
"КЫҺЫЛ КӨМҮС ХОРУОП" САХА ТЕАТРЫН ПРЕМЬЕРАТА
18 июня 2018 г., 16:12 391

 

 

Бу ааспыт өрөбүллэргэ Саха театра саҥа үлэтин көрдөрдө,Дмитрий Таас сэһэнинэн туруоруллубут мүччүргэннээх түгэннэрдээх "Кыһыл көмүс хоруоп" диэн испиктээкили.Саалаҕа норуот толору,Режиссер Руслан Тараховскай саха классиктарын туруорга идэлэнэр,холобура кини Николай Якутскай "Төлкө" диэн романынан оҥоһуллубут инсценировканы оҥорон көрдөрбүтэ,онтуката күн бүгүҥҥэ диэри аншлаг эбэтэр толору саалы хомуйар."Төлкө" диэн айымньы жанра драма,ол гынан баран көннөрү драма буолбатах--мелодрама хабааннаах драма.Биһиги көрөөччүбүт мелодраманы тоҕо эрэ олус сөбүлээн көрөр,индийскэй киинэлэри эмиэ да санатар курдук.Саха театрын репертуарнай бэлиитикэтин өйдөөтүм дии саныыбын.Манна билигин үс режиссерскай хайысха баар,бастатан туран Андрей Борисов,Сергей Потапов,Руслан Тараховскай.Олоҥхоттон саҕалаан Андрей Борисов тугу барытын туруорар,онно кини сатабыла,дьоҕура,өйө-санаата барыта түмүллэр,ол эрээри  "Хаарыан хампа күөх кытылым" таһымыгар тиийэр үлэтэ суохха дылы.Ол өйдөнөр даҕаны суол,тоҕо диэтэххэ эдэр сааһыҥ эрчимэ,харса суох быһыыта-майгыта уонна бииргэ үлэлиир дьонуҥ салгын куттара хатыламматтар,сорохтор,холобур туруорааччы худуоһуньук Геннадий Сотников,артыыстааҕар артыыст Симон Федотов эргиллибэт сирдэригэр барбыттара.Ол да буоллар,Андрей Борисов билигин да үчүгэйдик туруорар,Брехт "Мамаша Кураж и ее дети"диэн испэктээкилэ бэртээхэй үлэ,ол эрээри киһи дьик гыммат .Мин саныахпар кини хойутаан баран ылсыбыт,уопсайынан өс хоһоон "Кырдьар кырыыс"диэн арааһа театрга үөскээбит дуу диэх санаам кэлэр.Сергей Потапов режиссер быһыытынан пост-модернист диэҕи баҕарабын.Кини хас биирдии үлэтин бэркэ диэн сөбүлээн көрөбүн,ол эрэн кини көрөөччү тугу көрүөн баҕарарыгар адьаһын наадыйбат,кассаны оҥорор сорук киниэхэ инники кирбиигэ сылдьыбат.Биир түгэни кэпсиим,"Альберти циркэтэ "диэн испэктээкилгэ аттыбар биир эдэрчи кыыс олорбута,туох да үөрүү-көтүү бөҕөтө,сценаҕа клоуннар таҕыстахтарына саһыгыраччы күлэр,хас күлүүлээх түгэни кэтэһэр-маныыр.Чэ,бэйи,кыысчаан салгыы көрөн иһиэхпит ээ дии санаатым.Кини миигиттэн уратыта диэн Бергман Вечер шутов диэн киинэтин көрбөтөх буолуохтаах,оттон бу испиктээкил ол киинэ матыыптарынан туруоруллубут.Дьэ бүтэһигин диэки кыыһым улам күлбэт буолан истэ,бүтэһигэр тиийэн кэлэн хараҕыттан уу-хаар баста.Дьэ бу буолар режиссер Сергей Потапов кыайыыта,олох бэһиэлэй да өрүттээх,дьиҥ трагедиянан да бүтэр,хас биирдии киһи бу орто дойдуга хайаан да өлөр аналлаах,оттон ол хомолтолоох түгэн кэлиэр диэри театр,циркэ аралдьыталлар,саататаллар,күллэрэллэр,хомотоллор уонна ытаталлар даҕаны.

                      Бу кыһыл көмүс хоруоп туһунан испэктээкил хайдах туруоруллубутун аҕыйах тылынан ахтан аһарыам.Оччотооҕу кэм-кэрдии бэрт үчүгэйдик көрдөрүллүбүт,сценографията,уота-күһэ,музыката бэркэ талыллыбыт,барыта уот харахха диэх курдук.Ол эрээри сценаҕа туһаныллар туман,көрөөччүлэргэ тиийэн кэлэр,онтон сылтаан көрөөччүлэр сөтөллөн бараллар.Ити соруйан буолбатаҕа буолуо,наһаа интерактивнай түгэн,хата астмалаах киһи суох эбит,оннук ыалдьар киһи баара буоллар охтон түһүө этэ,суһал көмө да наада буолуо этэ.Эдэр ,орто уонна кырдьаҕас  көлүөнэ артыыстара олус үчүгэйдик үлэлээтилэр.Эдэр артыыст Николай Протасов дьоҕурдаах уонна талааннаах эбит,Таня Легантьева эмиэ бэрт ис киирбэхтик уобараһын айда.Оттон Ильяна Павлова Суоппуйата көрөөччүлэри соһутта даҕаны,куттаата даҕаны,аанньа буолуо дуо эдэр дьахтар бандьыыт чиччиктэртэн күһэлэнэн баран кинилэр илиилэриттэн өлөөхтүүр.Ильяна Павлова уонна режиссер Руслан Тараховскай Гаспар Ноэ  Необратимость  диэн ынырык киинэтин көрбүттэрэ эбитэ дуу, пьеса бу түгэнэ Моника Белуччи оонньообут эпизодун санатар. Кылаассабай утары турсууттан син бара сатаабыттар,ол эрэн кыһыллар,үрүҥнэр диэн өйдөбүлтэн бэрт сотору босхоломмоммут биллэн турар.Кыһыллары наһаа өрө тутартан босхолоннубут быһыылаах,дьэ оччоҕуна куһаҕан-үчүгэй диэн киһи өйдөбүл,үрүҥ-хара диэн курдук буолбата буолуо.Ханнык баҕарар киһи иһэ эриэннэх буолар.Ол эрэн биһиги итинник өйдөбүлү соччо ылыммат курдукпут.  


                        Урукку классикабыт өйдөбүлэ диэн,баай буолла да куһаҕан киһи,дьадаҥы буоллаҕына чиэһинэй,үлэһит буолар.Оттон бу Дмитрий Таас сэһэнигэр бандьыыттар ороспуонньуктар,киһи быһыытынан букатын сидьиҥнэр.Эмиэ үрүҥ-хара диэн принцибинэн салайтарыы,дириҥии түһэргэ бириэмэ да суох ,формата да атын--психологическай драма буолбатах,онон ТОҔО диэн ыйытык суох,турбат.Бириэмэ атаара син көрүөххэ сөп,хайдах эрэ оҕолорго туһуламмыт курдук--саа-саадах тутан баран сырсыаккалаһыы,эккирэтии эмиэ баар,ол эрээри наһаа тыҥааһыннаах диэҕи киһи тыла тахсыбат.Саха театрын сөбүлүүр дьоҥҥо анаммыт диэххэ дуу.    

Избранное
  • 18 июня 2018 г., 16:15
    Tat-Yana   Пожаловаться

    о, мин билиэттэн маппытым дьи)) от ыйыйгар барар инибин... онно туспа пост суруйом, хайаан да5аны)

  • 18 июня 2018 г., 16:18
    Tat-Yana   Пожаловаться

    уо.самай сыалым-соргугум диэн хаартыскаҕа туһэриэхтээх этим)

  • 18 июня 2018 г., 18:05
    Sjan   Пожаловаться

    Бандьыыттар образтарын Таас суруйбутуттан режиссёр хайдах да атыннык көрдөрөр кыаҕа суох буо. Баҕарбытын да иһин. Онон айыллыбыт кэминээҕи ирдэбилинэн бардаҕа дии.

Чтобы оставить комментарий, вам нужно авторизоваться или зарегистрироваться
Включите премодерацию комментариев
Все комментарии к этому посту будут опубликованы только после вашего подтверждения. Подробнее о премодерации
Обратная связь