home
user-header

                        
                        
Килиэп
14 апреля 2019 г., 16:45 1878

 


 

Оҕо сааһым килиэп уочаратыгар ааспыта диэтэхпинэ, сымыйалаабатым буолуо. ) Билигин даҕаны, ардыгар түһээн , ол саҕанааҕы маҕаһыыҥҥа килиэп ыла сылдьарбын көрөбүн.

 Ас маҕаһыына уһун да уһун, кугас өҥнөөх кыраасканан, атыннык эттэххэ "муоста кырааскатынын"  сотуллубут прилавоктаах этэ. Онно  икки продавец атыылыыра, икки ыйааһын турара. Уочарат ол прилавок устун барара, уҥа тоҥолохторун прилавок үөһэ ууран. Прилавок кэннигэр долбуурдарга араас астар бааллар.. Үөһээ долбуурга тимир баанкалаах балык кэнсиэрбэлэрэ, камбала, килька, рыбные котлеты, скумбрия о.д.а. аллараа өттүгэр таас баанкалаах, ол - бу лечо иҥин быһылааҕа. Онтон саамай аллараа өттүгэр, оҕону саамай ымсыырдар кэмпиэттэр кутуллан сыталлара, уонна пачкалаах бэчиэнньэлэр - эһэ сирэйэ ойуулаах "Привет" , саахымат ойуулаах " Шахматное" о.д.а. үрүт үөһэ сааһыланан тураллара . Саамай ыарахан сыаналаах сакалаат кэмпиэт киилэтэ алта солкуобайтан тахса этэ бадаҕа. Ол "Белочка" диэн , грильяжтаах кэмпиэт. Ыйанан атыыланар ас барыта улахан кумааҕы кулектарга угуллан атыыланар этэ. Билигин ол кумааҕыбыт моднайдык "крафтовай" дэнэр.)) Арааһа рулонунан кэлэр быһылаах эбит этэ , квадрат гына быһыллан сытар кумааҕыны, үчүгэй баҕайытык эрийэ тутан, кулек оҥорон таһаараллар этэ.

Дьэ бу маҕаһыыҥҥа аныгылыы эттэххэ тусовка диэбит сымыйа. Дэриэбинэ иһинээҕи сонуну барытын килиэп уочаратыгар турар дьон , ыһа- тоҕо кэпсэтэллэр. Билигин оннук миэстэнэн дэриэбинэҕэ маслоцех буолбут быһылаах.)) Үүт туттара баран бараннар, сонун бөҕөтүн истэн кэлээччилэр.)

Килиэби суол нөҥүө турар бэкээринэҕэ астыыр этилэр . Оҕо сылдьан онно элбэхтэ сылдьан турабын.)) Килиэби кирпииччэ оһох иһигэр буһараллар этэ. Маһа умайан бүппүтүн кэннэ, итии чох үрдүгэр ухватынан килиэп формаларын угаллар. Ол саҕана билиҥҥи курдук электрическай оһохтор суохтар . Оо, бэкээринэ сыта наһаа да минньигэс буолар этэ. ) Билигин да өйдүүбүн. Килиэп оһохтон тахсан баран, долбуурдарга туран сойор. Онтон тэлиэгэҕэ тиэллэн , маҕаһыыҥҥа кэлэр. Тэлиэгэ үрдүгэр турар хоппоҕо өрөһөлүү саһарчы буспут, сып- сылаас килиэп тиэллэн кэлэр. Түннүгүнэн көрөн туран: "Килиэп иһээээр!"- диэн хаһытыыллар. Уочарат суугунаһа түһээт, сааһылана охсор. Килиэп таһар оҕонньор үтэн аҕалан, истиэнэҕэ баар хайаҕаһынан биир биир килиэби биэртэлиир. Килиэп дьаарыстана турар кэмигэр, дьон долгуйан барар . "Биирдии киһиэхэ үстэн элбэҕи биэримэҥ! Кими да быһа киллэримэҥ! "- иҥин диэн саҥалар иһиллэллэр.  Саамай кыһылааҕа диэн, килиэптэн матыы. Ытыы сыһаҕын. Оччоҕо дьэ, иккис оборуот тахсарын кэтэһэргэ тиийэҕин. Ордук сайын килиэп уочаратыгар күнүн баранар. Килиэби отчуттар, фермалар кэлэн куулунан илдьэ бараллар. Онон сайыҥҥы өттүгэр килиэби түүннэри астыыллар. Маҕаһыын сабыллыбытын кэннэ, аны бэкээринэ чуолҕанын манааһын буолар.) Килиэпкэ дьэ наканеста тигистэххинэ, дьиэҕэр тиийиэххэр дылы, килиэпкин төгүрүччү кирэн тиийэҕин.))

Биирдэ сайын, уочаракка туран, уҥан хаалбыт этим. Өйдөммүтүм, подсобкаҕа олоппостор үрдүлэригэр сытыарбыттар этэ. Эдэркээн биэлсэр кыыс, непрямой массаж сердца оҥоро турар эбит. Мин: " Утуйуохпун баҕарабын"- диибин. Ону : " Утуйума, утуйума!"- дииллэр. Ийэм кутталыттан, халаатын да уларыппакка, тапочканан сүүрэн кэлбит этэ. Оҕо, оҕо курдук, кыратык дьиэбэр сыта түһэн баран, туран оонньуу барбытым.) һоннук.))

Чэ, аны икки күн суруйарым хаалла.

 

#сахалыы

#биирнэдиэлэсахалыы

Избранное
  • 14 апреля 2019 г., 17:33
    NIKA_SOVA   Пожаловаться

    *скоро материться начнёт, потому что ни один последний пост стрелы прочесть не может*

  • 14 апреля 2019 г., 17:48
    karapot   Пожаловаться

    Ээ па, онтон салгыы суруйбаккын дуо? Наhаа учугэй аа5арга олох буспут килиэп сытын билбит курдук буоллум)

    • Автор
      14 апреля 2019 г., 17:57
      стрела81   Пожаловаться

      karapot, махтал) оттон суруйдахпына даҕаны, наһаа күн аайы буолбат ини.дьоҥҥо да надоел буолуом. Эмиэ суруйбут диэхтэрэ.))

  • 14 апреля 2019 г., 17:52
    LyubOFF   Пожаловаться

    Оо этимэ)) мин эмиэ килиэпкэ уочараттан кэлбит киьибин билигин даганы дойдубар бардахпына уочарат баар. Аныгылыы ватсабынан "ким бутэьигий? мин эн кэнниттэн" диэн смс беге

    • Автор
      14 апреля 2019 г., 18:00
      стрела81   Пожаловаться

      LyubOFF, ээ, аныгы үйэ сиэринэн ватсапыбан диэ. ) Оннооҕор биир дьиэ иһигэр ватсаптаһабыт . Дьэ дьаабы. билигин мин дойдубар килиэпкэ уочарат суох буолан, оҕолор абыраналлар. Сүрэҕэлдьии2 маҕаһыынтан баран ылыахха эрэ наада.)

  • 14 апреля 2019 г., 18:05
    MarthaMyDear   Пожаловаться

    Мин хата эһиги постаргытынан сахалыы тылы үөрэтэбин, махтал))

  • 14 апреля 2019 г., 18:22
    тьма   Пожаловаться

    Ты умничка! Никого не слушай.

    Публикуй сахалы. Пусть будет!

    Хоть я и через переводчик (с монгольского))) сижу, но это очень важно для языка

  • 14 апреля 2019 г., 18:56
    Tat-Yana   Пожаловаться

    Тыый! Хата бэртээхэйдик толкуйдаабыккын бытта! Челлендж игин бөҕө))) сахалыы туох диэн эбитэ буолла?

    Уааай, онтон мин сахалыы суруйбатаҕым наһаа ыраатта дии... олох умнааш, бүтээш, ньаппайааш. Тииспин-уоспун оҥостон баран кыттыһарым ду)

    Сахалыы төһө ааҕар эбиттэрий? Манна сахалыы соччо элбэх киһи аахпат курдук ди

  • 14 апреля 2019 г., 19:31
    HamsterHamster   Пожаловаться

    Эээ айка

    Эмиэ сурэгэлдээтим ди

  • 14 апреля 2019 г., 20:33
    TRN   Пожаловаться

    25 этэ дуу сыаната? Биһиги килиэп ылан иһэн кырыытын кэбийэн мөҕүллэр буоларбыт. Ынырык да минньигэс буолааччы.

    • Автор
      14 апреля 2019 г., 21:27
      стрела81   Пожаловаться

      TRN, 22 копейка быһылаах этэ.) тыа оҕото бары да килиэпкэ уочараттаан буспут - хаппыт буолуохтаах. Сып- сылаас килиэп хорудьуоскатын былдьаһыы буолааччы. Мин убайбын кытары килиэп икки өттүн быһа охсон. арыылаан, саахардаан, эбэтэр күөх лууктаан сиир этибит.)

  • 14 апреля 2019 г., 23:21
    Невидимка_   Пожаловаться

    Очень жаль, что в последнее время не могу читать ваши посты. Было интересно. Понимаю, язык своего народа - свято!

  • 15 апреля 2019 г., 00:07
    xotyyna   Пожаловаться

    суруй-суруй! күн аайы да суруй,сөбүлээн ааҕабын,хойутаан да буоллар.дьиэбэр кэллэрбин,өйбүн-төйбүн буоллахпына мин эмиэ ыһа-тоҕо суруйуом

  • 15 апреля 2019 г., 01:19
    ДевушкаПоэт   Пожаловаться

    Как это знакомо) стоять в очереди с утра за хлебом, который продавали в единственном большом на всю деревню продуктовом универмаге. Приходилось вставать в 7 утра. И потом по пути домой съедать корочку тёплого вкусного хлеба.

  • 15 апреля 2019 г., 01:24
    ДевушкаПоэт   Пожаловаться

    Магазине*

  • 15 апреля 2019 г., 06:04
    Red05   Пожаловаться

    Аһары үчүгэйдик оруобуна суруйбуккун бытта. Отой итиннэ аттыгар мин эмиэ килиэп уочаратыгар сылдьыбыт курдукпун дии. Ааҕа олорон сүрэҕим тэбиэлээтэ. Оо, оҕо саас барахсан!

    28 кэппиэйкэ этэ. Харчы тобоҕунан сакылаат кэмпиэт ылаҕын, 100 грамм диэтэххинэ- 7 штуканы ыйааһына да суох бырадабыас *быраҕан* биэрэр этэ.

    • Автор
      15 апреля 2019 г., 07:15
      стрела81   Пожаловаться

      Red05, махтал) сакалаат кэмпиэт 7 устуука киирэр, ылар этим эмиэ.) Дэриэбинэ оҕото үксэ килиэпкэ сылдьар , куораттар бөтүөн туппутунан, үүт ыла бараллар быһылаах этэ )

  • 15 апреля 2019 г., 09:05
    Kori_Night   Пожаловаться

    Оҕо сааһым эмиэ килиэп уочаратыгар ааспыта. Дэриэбинэҕэ билигин да килиэп уочарата диэн баар. Ещё в деревнях сейчас пекарни стали закрываться. Поэтому одна деревня с пекарней обеспечивает все близлежащие пекарни. Или даже с райцентра везут хлеб.

  • 15 апреля 2019 г., 10:26
    Левта   Пожаловаться

    Барахсаттар, биЬиги бары сайын да утуетугэр утуйан тэптэрэ сыппатахпыт. Наар килиэп эккирэтиЬиитэ. Сарсыарда 9 аЬыллар магаЬыынна 7 туруоран килиэпкэ суурдэллэр этэ. Аны килиэп киирбитин кэннэ, сайын, оччуттарга диэн куулунан уочарата суох мотоциклынан кэлэн ылар этилэр. Оччуттартан атын аЬыыр дьон суо5ун курдук. Ол кэннэ хаалбыт килиэби биир тебеге биири эрэ биэрэллэрэ. Онно тиксээри хара сарсыардаттан сууруу - ол эмиэ мин о5о сааЬым.

    • Автор
      15 апреля 2019 г., 11:01
      стрела81   Пожаловаться

      Левта, мин наьаа 7 чааска турарбын ейдеебеппун ээ. Ма5аьыыммыт 10 улэлиир буолан, наьаа эрдэ туруорбаттар быьылаах этэ. Тыа о5олоро, о5о сааспыт барыбыт киэнэ биир майгыннаьар еруттээх. Бары килиэп уочоратыгар улааппыт дьоммут.))

  • 15 апреля 2019 г., 11:36
    apple1983   Пожаловаться

    Биирдэ субьота кун оскуола кэнниттэн кэм буоларын курдук килиэп ыла пекарня5а кылааспыт о5олорун кытта суурбуппут. Кэм буоларынан эмиэ маппыппыт:) пекарьтан дьонной ыйталлар ессе килиэп тахсар дуо диэн ону пекарь кыы4ырбвт, сылайбыт куола4ынан: "айуу айа сеп буолуо. 6та та4аардыбыт бугун диир. Онуохса одноклассникпыт этэр: " айуу аца би4иги 6та маттыбыт":)))

  • Өссө бидоҥҥа үүт аҕалаллар этэ, эмиэ уочараттах буолара.

  • 15 апреля 2019 г., 11:50
    Быйанг   Пожаловаться

    Бэрт баҕайы дии - сахалыы суруйарыҥ. Интернетка сахалыы тылынан суруллубуту, эн курдук суруйан элбэтэргэ кыһаллар дьоннор ахсааннара элбии тураллара буоллар.

  • 15 апреля 2019 г., 11:52
    Быйанг   Пожаловаться

    Кыра дэриэбинэлэргэ килиэп астыыр сирдэрэ кырата бэрт буолан, аҕыйаҕы, эбэтэр киһи ахсаанынан астыыллара буолуо. 

    • Автор
      15 апреля 2019 г., 11:58
      стрела81   Пожаловаться

      Быйанг, киһи ахсаанынан буолбакка, ол саҕана биир оборуот, оһох иһигэр төһө халыып батарынан буолар. Төһө бэйэлээх киириэй, кирпииччэ оһох иһигэр.)

  • 15 апреля 2019 г., 14:22
    олишна   Пожаловаться

    Биьиги бэкээрнэбит арыый аныгылыы диэххэ дуу, модернизированнай диэн сеп буолуо эбит, бу санаатахха, били улуус киинэ буолан игин буолуо. То5о диэтэххэ, эмиэ маьынан оттуллар оьох эрээри, килиэп буьар сээкэйэ тегюрюк, цилиндр формалаах этэ, ол цилиндр эргийэр онно эрээтинэн формалар угуллаллар. Кылааьынньыгым сайын онно юлэлиир этэ, оьохчутунан, ол иьин эрэ билэбин. Тиэстэтин эмиэ туспа мэьийэр массыына баара. Дьэ ол биир килиэп форматыгар биир куурусса оруобуна батара))), биьиги кюлюгээн со5ус дьон этибин, онон хантан эбит куурусса тэлибиритэн а5алаллар уолаттар, ыраасты охсоллор уонна ол форма5а анньан кэбиьэллэр))) минньигэс да буолар этэ. Онтукабыт барытын тююн дьаабылыыбыт 

    • Автор
      15 апреля 2019 г., 14:30
      стрела81   Пожаловаться

      олишна, килиэптэри кытары бииргэ куурусса угар этигит дуо?))) ким да билбэтэҕэ дуо? Биһи эмиэ араас быракааһы бары оҥорор этибит. Уолаттар клуб, спортзал, даже балыыһа күлүүһүн аһан киирэллэр этэ. Тугу да уорбаппыт конечно, просто дьээбэлэнэн. Билбэттэр быһылаах этэ, ким да туох да диэн айдаарбатаҕа.

  • 15 апреля 2019 г., 14:30
    virb   Пожаловаться

    килиэп дьаат, сиэмэн :) сиэтэххитинэ сиэн бара туоруоххут

    • Автор
      15 апреля 2019 г., 14:35
      стрела81   Пожаловаться

      virb,килиэби сиэн, сиэн кэллэхпит дии))) билигин да сиибин эрээри, лаппа аҕыйаттым.

      • 15 апреля 2019 г., 16:58
        virb   Пожаловаться

        стрела81, мин килиэппин тохтоппутум, куруук килиэп сиэн мээнэ уойа5ын эрэ, тусата суох билинни олоххо, атын араас ас баарын кэминэ. Арай дьэ былыр согус, атын продукта олох кэмчи кэмигэр, килиэп этэргэ дылы саамай сурун ас этэ. Килиэппин быра5ан баран хасан эмэ килиэп мотуйдахпына курта5ым ыарыр5атар эбит, ба5ар насаа табыгаса суох продукт буолуо, онноо5ор ууту испэт, сатаан истэрэ бусарбат дьон бааллар буотта.

        Билинни килиэпкэ уонна туран насаа элбэ5и эбии куталлар, хас эрэ хонон баран буорту буолбат килиэп ама натуральнай буолуо да. Осуоба тостовай килиэп оннук. Барыта явка консервант уонна амтан тупсарыыта, глютамат игин буолуохтаах. Аны туран бурдукка бэйэтигэр ону маны куталлар, антислеживатель, от гниения, от вредителей, ба5ар олох да ыйаасын элбэтээри кутуохтарын да соп буолуо, 40 кг бурдук холобура 10 кг туга да биллибэт балласт, уопсайа 50 кг кууллаах бурдук буолуо ди.

        • Автор
          15 апреля 2019 г., 20:28
          стрела81   Пожаловаться

          virb, эчи кутталын. кэнники аллергик наһаа элбээтэ, былыр аллергия диэн ыарыы баарын, түһээн да көрбөт этибит. Маҕаһыын аһа дьаабы, барыта оннук- маннык добавка, усилитель вкуса, консервант, краситель, маргарин. Киһи этэ- сиинэ иннин- кэннин билбэт гына букуллар.

  • 15 апреля 2019 г., 20:11
    Marty_Mc   Пожаловаться

    дьэ, эн эрэ буотах, инник эрэйи кербут, ол да буоллар матар сан,а хомойуу суо5а, билин,н,и о5олор инник эрэйи билбэттэр, оонньообокко олохпут уочаракка ааспыта(((

Чтобы оставить комментарий, вам нужно авторизоваться
с помощью аккаунта в соц.сети
Включите премодерацию комментариев
Все комментарии к этому посту будут опубликованы только после вашего подтверждения. Подробнее о премодерации
Обратная связь