home
user-header

                        
                        
Хараҥаҕа
16 апреля 2019 г., 17:54 245

 

"Оҕо сылдьан хараҥаттан куттанар этигит дуо? Түүн куттанан суорҕан анныгар саһар этигит дуо?"-  диэн ыйытан баран, били Тайд рекламатыгар курдук:" Тогда мы идем к вам!"- диэхпин баҕардым.))

Мин түүҥҥү хараҥаттан ынырыгын куттанар этим. Эбиитин убайым " Түннүгүнэн ким эрэ көрөн турар! "- диэн куттуур этэ. Мин оҕо эрдэхпинэ түннүгүнэн көрөр киһи баар буола сылдьыбыта. Атаҕын суола түннүк анныгар хаалар эбитэ үһү. Уонна, куоттаҕына, түөрт мастаах күрүөнү үрдүнэн таах ойон кэбиһэр үһү. Кимэ- туга биллибэтэҕэ. 

Кырдьыгын эттэххэ, билигин даҕаны хараҥаттан куттанабын. Түүн, ыйдаҥата суох былыттаах халлааҥҥа, дьиэн иһэ ытыс таһынар хараҥа буолар. Уот умулуннаҕына, бастаан утаа туох да көстүбэт. Онтон, улам улам харахтарын хараҥаҕа үөрэнэнннэр, түннүк арыый да  сырдаан көстөр буолар. Дьэ оччоҕо, һуу гынаҕын.

Ол гынан, элбэх буоллаххына, хараҥаттан куттаммаккын. Оҕо сылдьан, күһүҥҥү хараҥаҕа , атырдьах ыйын бүтүүтэ иҥин, хойукка дылы таһырдьа оонньуур этибит, ордук сасыһа оонньуур үчүгэй буолааччы. Дэриэбинэҕэ уот барара сонун буолбатах. Ордук сайын баран эрэйдээччи. Уот бардаҕына, дьиэ иһэ уу- чуумпу буолан хаалар. Хос аайы чүмэчи уота кыламныыр. Бэйэтэ туспа атмосфера.)

Хараҥаҕа олорон тугу гынар этибитий? ) Чүмэчи тула уларан " случай " кэпсэтэр эбит . Тоҕо " случай" диэн ааттыырбытын туох да билбэт.)) "Һулуучай кэпсэтэбит да?"- диэн буолар. Билигин ол кутталлаах кэпсээннэртэн биири да өйдөөбөт эбиппин. Арай кыһыл бачыыҥка туһунан һулуучай баарын өйдүүбүн.) 

Уот бардаҕына , түмсэ түһээт, остуол оонньуутун , пластилинынан , тимир конструкторынан, арыый улаатан баран лото, хаартынан подкидной дурак, баарыс оонньуур этибит. Кинигэни " Бу кыыс хараҕын буортулаары"- диэн, мөҕүллэ, мөҕүллэ чүмэчи да уотугар ааҕар буолуллара. )

Уот бардаҕына, саамай кыһыылааҕа туох буолуой, улаатан эрэр оҕоҕо? Субуотаҕа , оскуолаҕа биэчэр буолуохтаах күнүгэр , уот баран хаалара. Хомойуу диэн кытаанаҕа буолар этэ.)

Билигин санаан кэллэххэ, урут оонньуу сылдьан туттар тылларбыт нууччалыы эбиттэр. Ону биһиги ис хоһоонун өйдөөбөккө эрэ, хайдах баарынан саҥарар эбиппит. Холобура "кинээй" диэн тыл баар этэ лаптаҕа. "Ким "кинээй" буоларый?"- диэн ыйытыы буолар. Дьиҥнээҕэ "кидай" диэн тыл быһылаах. Мээчиги өрө быраҕар киһини "кинээй" диир этибит. Өрө быраҕан баран , куотуу буолар. Аны "напрахот" диэн тыл баар этэ. Күүскэ мээчиги маһынан охсор киһини итинник ааттыыр этибит. Кини охсор , бары сүүрэбит. Билигин санаатахха " на проход" диэн быһылаах. Өссө кыргыттар "түннүгүлүү" буола оонньуур этибит. Өйдүүгүт? Онтукабыт "Чур, не голю!" эбитэ буолуо. Ол куота сылдьан , сылайдахха , тохтоон баран, "тыҥклюш" диир этибит. "Дом- ключ" диэн быһылаах сэрэйдэххэ  .)) Сасыһа оонньуурга көрдүүр оҕо:" Бручка палка кэллим, дьиэлээх хотун буоллум!"- диир. "Палка- выручалка " диэн буоллаҕа буолуо,

Оттон "штандр" диэн оонньуу , туох диэн эбитэ буолла?

 

Биир нэдиэлэлээх бэйэбин кып- кыратык тургутан көрүүм бүттэээ! ( үөрдэ, уонна көлөһүнүн туора сотунна)

 

 

#сахалыы

#биирнэдиэлэсахалыы

 

Избранное
  • 16 апреля 2019 г., 18:07
    karapot   Пожаловаться

    Бырыычка-бырыычка диир этибит эмиэ) атырдьах ыйыгар киэhэ хойут сасыhа оонньуур астык да буолар этэ, хабыс-хараҥа, кутталлаах)) штандыр диэн мээчиктээх оонньуу этэ, туох тыла эбитэ буолла, немецтии буолуо дуу?

  • 16 апреля 2019 г., 20:40
    taaanyaaa   Пожаловаться

    Ого сылдьан итинник оонньооботох эбиппин. Куруук дьиэ улэтэ буппэт курдуга.

    • Автор
      16 апреля 2019 г., 21:15
      стрела81   Пожаловаться

      taaanyaaa, эһиги саҕана атын оонньуулар буолуо арааһа.) Лаптаны иҥин оонньуур этилэр дуо?

      • 16 апреля 2019 г., 21:31
        taaanyaaa   Пожаловаться

        стрела81, быйыл 35 сайыммын керсебун)) оонньууллар этэ. Ыымсыырар этим да, бириэмэ суога.

        • Автор
          16 апреля 2019 г., 21:55
          стрела81   Пожаловаться

          taaanyaaa, миигиттэн син биир балыскын)) оо, кытаанах оҕо саас эбит. Мин кыра балтыбын сүгэ сылдьан , син биир ооньуу барар этим.дьиэбит таһыттан улаханнык ырааппат этибин. Оонньуур оҕолорум бары биир уулуссаҕа олорор этибит. Сайыҥҥы өттүгэр, түүн 11 чааска дылы көҥүллэнэр этэ оонньуурбут. Онтон төрөппүттэрбит тахсаннар хаһытыыллар этэ, ыҥыртаан. Оччоҕо оонньоон бүтэн, бары тарҕаһар этибит.)

  • 16 апреля 2019 г., 23:16
    DearDear   Пожаловаться

    Штандырдаан биэрэр этибит :) билигин быраабыланы да өйдөөбөппүн. Өссө тээпи-лээпи баар этэ ди, тяп-ляп диэнтэн быһылаах, санаан көрдөххө :)) хараҥаттан куттанан! Случай бөҕөтө, кыһыл пионертан күөх бэрчээккэҕэ дылы :)) билигин даҕаны кыһын хараҥа түннүгү көрөрбүн куттанабын, уопсайынан куттас баҕайыбын

    • Автор
      16 апреля 2019 г., 23:32
      стрела81   Пожаловаться

      DearDear, мин билигин дэриэбинэҕэ тахсарбар, ночникпын илдьэ сылдьабын.) Оҕо сырыттахпына, кухняҕа түүн уот холбонон турар этэ.

  • 17 апреля 2019 г., 08:52
    Kori_Night   Пожаловаться

    Сороҕор хараҥаттан куттанар этим. А так хараҥаны сөбүлүүр этим. Уот бардаҕына биһиги түбэлтэ кэпсэтэр этибит. Случай диэн кэлии оҕолор ааттыыллар этэ. Эҥин араас бредовай страшилка бөҕө кэпсэнэр этэ. Арай киһи күлүөх акаары баҕайылар этэ да куттанар аҕай этибит. Хараҥаҕа шпион-милиция оонньуур этибит. Астык баҕайы. Кыһын дьиэҕэ чүмэчи уотугар кэпсэтии, кинигэ ааҕыыта буолар. Чүмэчи кусочектарын былдьаһыы буолар.

    • Автор
      17 апреля 2019 г., 09:13
      стрела81   Пожаловаться

      Kori_Night, дьикти, о5о сылдьан кладбище5а сылдьартан куттаммаккын, елер туьунан санаабат да буолла5ын ди. Уонна ол-бу араас сымыйа страшилкалартан , харанаттан куттаныы бе5е буола5ын.) Шпион- милиция диэн, биьиги са5анаа5ы казаки- разбойники курдук буолуо дуу.

  • 17 апреля 2019 г., 12:57
    олишна   Пожаловаться

    Бу санаан кербютюм улаханнык харанаттан куттаммат эбиппин. Дьэ оттон ол харана иьигэр туох эрэ баарыттан куттаныахпын сеп, соро5ор кутталика эмискэччи киирэн ылааччы. 

    Ити оонньуулары эмиэ оонььон а5ай))) ол гынан баран сорох эьиги туттар тылларгытын букатын истибэтэх эбиппин. Напрохот, кинээй игин) Тюннюгюлюю баара))) Билигин олорон ити курдук тыллары ейдюю сатаатым да туох да тебебер киирбэтэ - дьинэ баар буо.

    Олох кыра сылдьан сэриилэьэ оонньуугун, быраабыла игин бе5е, хас тыыннааххын игин кэпсэтии. Дьэ уонна елбюккюн елбетеххюн быьаарсыы айдаана))) Уонна: Сана сэрии са5аланна! - диэн хаьыытаат эмиэ оонньон буккула5ын))) Ниэмэс буолумаары эмиэ сордоно5ун. Учюгэйдэр, куьа5аттар игин диэн араарыы

    • Автор
      17 апреля 2019 г., 13:27
      стрела81   Пожаловаться

      олишна, биһиги сэриилэһэ оонньуурбутугар, биһиэннэрэ уонна ньиэмэстэр буолан оонньуур этибит, саабылалаһа оонньоон, онтон мантан түҥнэритэ анньыһан иҥин. Кулууп олбуоругар баар трибуна үрдүттэн охтон . Уолаттары кытары оонньуур буолан, футбол, хоккей, тыаҕа штаб туттан , эдэр мастартан паршюттаан, сыыр быарыгар хороон хастан, чугас күөллэргэ мундулаан, тыаҕа моҕотойдоон улааппытым. Ыстаан бөҕөтүн хайа түһэн.)) Хата мөхпөттөр этэ.)

Чтобы оставить комментарий, вам нужно авторизоваться
с помощью аккаунта в соц.сети
Включите премодерацию комментариев
Все комментарии к этому посту будут опубликованы только после вашего подтверждения. Подробнее о премодерации
Обратная связь