home
user-header

                        
                        
Сайыны хайдах атаарбытым туһунан (#SummerLife2021)
Alaas_uola 30 сентября 2021 г., 19:50 3956

Бүгүн Дьокуускай куоракка маҥнайгы хаар түстэ. Сайыммыт номнуо ааһа охсон, аны өйдөбүл эрэ быһыытынан хааллаҕа.

Төһө да уот кураан уонна буруолаах сайын буоллар, миэхэ бу ааспыт сайын олохпор биир бастыҥ буолар. 

  

 


Сайыны биһиги ыам ыйын 22 күнүттэн ааҕабыт. 

Ыам ыйын 22 - күөххэ үктэнии, саха саҥа дьылынан биллэр, оттон православиялыы - Ньукуолун (Николин день). Бу күн мин тыаҕа хонордуу кустаан баран, булт кэмин түмүктээн, 22 күн дэриэбинэбэр киирбитим. Ол туһунан элбэх тылы эппэккэ, булду сэҥээрээччилэргэ ютуб ханаалбар кылгас киинэ көрөргүтүгэр ыҥырабын. Сөбүлүөххүт диэн эрэнэбин.

 

 

Сайын саҕаланыыта олус да тымныы этэ! Бэс ыйын саҕаланыар диэри түүннэрэ сөрүүнэ, үүнээйигэ сөбө суоҕа. Ойуур ыам ыйын тиһэҕэр диэри көҕөрбөккө турбута. Ол да курдук кус улахан суоҕа, хонууга уу тахсыбатаҕа, күөллэр хойукка диэри муустаах сыппыттара.

 

 сынньалаҥҥа үүттээх чэйдэ иһиэххэ

 

Бэс ыйыгар мин тыаттан куоракка кэлэн бэйэбэр саҥа эйгэни арыйбытым. Кэлээт даҕаны илииттэн ботуччу сыанаҕа Stark Hunter 29.9 D диэн тэбэр көлө (велосипед) атыыласпытым. Биир эрэ ый тэбиллэн баран, сайыны быһа таах турда. Бу көлөбүн, арба, удамыр сыанаҕа атыылыыбын. Ким атыылаһыан баҕалаах манна суруйаарыҥ. 

 

 

 Stark Hunter 29.9 D

 киэһэлэргэ бэлэсипиэтинэн куорат көстүүлээх сирдэрин кэрийэр этим

 

Ол курдук бэс ыйыгар төбөм иһэ барыта урут истибэтэх терминнэрбинэн - "ситифермерство", "city growing", "питательный раствор", "TDS-метр", араас уоту мээрэйдиир кельвиннэр уонна люкстар буолан хаалбыттара. Кылгастык эттэххэ, куорат эйгэтигэр сиэмэттэн үнүгэс тартаран ас оҥостуу. Холобур, подсолнух, хаппыыста, горох, руккола о.д.а. сиэмэлэрин эргийэ турар суурадаһыннаах уулаах стеллажка үүннэрии, термининэн эттэххэ - гидропоника. Гидропониканы маҥнай көрдөххө судургу курдук - ис-иһигэр киирэн истэҕиҥ аайы ымпыга-чымпыга элбээн, уустугуран иһэр. 

 

 ууга суураллыбыт элеменнэр ахсааннарын көрдөрөр тэрил

 

 гидропоника 

 

 микрозелень

 

 араас сиэнэр үүнээйилэр

 

 

 

 горох (аһара сиппит)

Үүнээйилэри куорат рестораннарыгар уонна биллэриинэн дьоҥҥо атыылыыр этибит. Мин саныахпар, биһиги дьокуускайдар өссө да гидропоникаҕа үүммүт аһы сии үөрэнэргэ бэлэммит суох. Бу туһунан киэҥ сырдатыы, дьон-сэргэ билиитэ тиийбэт дии саныыбын. Уонна даҕаны, дьон харчыта кэмчи, үгүспүт да бары доширагынан, тушенкаларынан аһылыктанабыт... 

 

Кыратык хамнастаһан баран, от ыйын саҕаланыытыгар дойдубар тиийэн окко сылдьыбытым. Кытай Xingtai-180 тыраахтарынан, илии хотуурунан ый аҥарын быһа оттоон, түөрт орто оту туруорбуппут. Баһаардар үгэннээн тураллара. Ону тэҥэ эргэ күрүөлэрбин саҥардан, сабыс-саҥа ааннаах остуолба күрүө туппутум. Соҕотох киһиэхэ чахчы ыарахан этэ. баҕаналары ойууртан соһуу, сиэрдийэ охторуу, хатырыктааһын, баҕана үүтүн хаһыы, ууруу-тутуу, соһуу... Ол да буоллар, нэдиэлэттэн ордук сылдьан 2-3 от киирэр күрүөтүн дьэндэппитим. Кырдаайыта, итиитэ, буруота диэн... туһунан кэпсээн...

  

 

 быйыл сайын күлүмэн олус хойуу

сэбиэскэй от охсор

 

 элбэх сыллаах от - Кострец безостый

эксперимент быһыытынан ыһыллыбыта

үүнүү үчүгэй

 аныгы илии хотуура

 

 

 ходуһаҕа Кытай эрэ араадьыйата хабар...

 үрдүк күрүөҕэ кыһын сылгы ыстанан киирбэт

 

 

Ардыгар ип-итиигэ буруо быыһыгар от охсо-мунньа сылдьан салгыныҥ тиийбэт буолан аҕылаан ылаҕын. Тула хоп-хойуу буруо үп-үрүҥүнэн бүрүллэн турара, күн кытаран эрэ көстөрө киһини сүрдээҕин баттыыр этэ. Ардаҕы кэтэһэ сатыыгын да, кэлэр санаата суох. Сарсыарда балааккаҕа уһуктан баран "оо арай билигин балааккам аанын сэгэттэхпинэ күөлүм көстүө, уҥуоргу ойуурбун көрүөм дии саныыгын да - суох. Күн аайы буруо да буруо, туох да көстүбэт үлүгэрэ. Ардыгар тыалырар, оччоҕо буруо кыратык убаан ылар. Маннык түгэҥҥэ кыратык да буруо кыччаатаҕына оҕолуу үөрэҕин, кылгас кэмҥэ дуоһуйан ылаҕын. Дьон барыта баһаар ханна тиийбитин, ким көмөҕө барарын, МЧС көмөлөһөрүн-суоҕун, ардах кэлэрин туһунан кэпсэтэрэ. Төлөпүөммэр Windy диэн сыһыарыы туруорунан, тыал хайысхата уларыйарын, буруо ханна халыйарын, ардах ханан түһэрин барытын көрө олорорум, ол курдук сарсын-өйүүн тугу гынарбын былаанныырым.

 

 биһиги өссө салгын ыраастыырдаах буолан абыраммыппыт

 

 күн аайы Silent Hill курдук 

 

Киһи хараҕа буруоҕа үөрэнэр эбит этэ. Бастаан утаа ууланан сордуур буоллаҕына, соторунан кыһаллыбат буолбуппут. Ити курдук бэс ыйын бүтүүтэ саҕаламмыт баһаар буруота атырдьах ыйын ортотугар диэри турбута. Икки ый кэм устата аһыы салгыны эҕирийэн доруобуйабытын төһө айгыраппыппытын, инники олохпутугур тугунан дьайыан сөбүт Айбыт Таҥара эрэ билэн эрдэҕэ.

 

  биир үтүө күн күнүспүт түүн буолан хаалбыта

төрүөтэ туохтан буолуой?

 

 улуу кураан, күөллэр уолан бөҕө...

 

Бу быһылааҥҥа салалта эрэ буруйу сүгэр, чуолаан саха сирин былаастара дииллэрин мин кыратык эрэ сөбүлэһэбин. Тоҕо диэтэр, маннык улахан ойуур баһаардара Саха сирин аныгы историятыгар буола иликтэр. Ким даҕаны маннык буолуо диэн тымтыктанан көрбөтөҕө. Ону ааһан уһун сылларга салҕана турар кураан уонна сааскы-күһүҥҥү өртөөһүнү бобуу кэккэ уустуктары үөскэтэр. Санаан көр, уонунан сылларга мунньуллубут халыҥ лаҥхаҕа уот кыыма түһэр түгэнигэр биирдэ уотунан уһуура түһэр. Маны киин былаас билээхтээбэтэ буолуо дуу... Улахан уоту айылҕа бэйэтэ эрэ кыайар, икки атахтаах ону кыайан тохтоппот. Урут өртөөн-өртөөн баччааҥҥа диэри кэллэхпит.


Мин саныахпар баһаар биһиги былааспыт ыытар бэлиитикэтэ сиикэйин тоһоҕолоон көрдөрөргө, онтон босхолонорго, ыраастанарга ыҥырарга дылы. Бу маннык көстүү салҕанан бардаҕына, бэрт сотору өссө атын улахан алдьархайдар тахсаллара саарбахтаммат.
 

Оттоон бүтэн баран балыктааһынынан, сир астааһынынан, чуолаан моонньоҕон хомуйуунан дьарыктаммытым. Балыктаабытым туһунан кэпсиир буоллахха, күөллэр уһун кураантан уолан, балыктыырга улахан табыгаһа суоҕа. Урут элбэх эмис соболооҕунан аатырар күөллэргэ билигин көмүс хатырыктаах суох. Бу ааспыт икки сылга күөл бөҕөтө уолла. 

 

 кучу чэй сибэккитэ

 

 Күөх Боллох бэлэҕэ

 

 тыа киһитин күннээҕи остуола

 

 

 

 үргүү сылдьан сиэ суохтааххын )

 

  хаптаҕас эмиэ хойуутук үүммүтэ

хаһыс да сылын луугу уонна чесногу оҕуруокка олордобут

 

Айахпытыгар син илимнээн, ардыгар ыалларга түҥэтэн, таҥаһым бүтүннүү балык сыта буолуор диэри уһуннук дьарыгырбытым. Дойдум соботун минэ, ыһаарыламмыт собото туохха да тэҥнэммэт...

 

 

Сайын бүтүүтэ сахаларга атырдьах ыйын 19 күнүгэр диэри. Атырдьах ыйын иккис аҥарыттан сөрүүдүйэн, от-мас кэхтэн барар. Бүтэһик сылларга күһүммүт хойутуу кэлэр буолан, сайыммыт уһаабыкка дылы. 

 

Бу ааспыт сайын мин үөрэхпин 2019 с. бүтэриэхпиттэн ыла үргүлдьү үс сыл кэриэтэ тохтоло суох сарсыарда аҕыс чааска дьиэҕиттэн тахсан - киэһэ хойукка диэри үлэлээн бэйэбин билбэт буолуохпар диэри сылайбыт сылаабын таһаарарга, өйбүн-санаабын ыраастанарга, эппин-хааммын чэбдигирдэргэ (төһө да буруоҕа сырыттарбыт), айылҕалыын алтыһарга, сааһырбыт төрөппүттэрбин кытта бииргэ буоларга анаммыт эбит. Ол иһин 2021 с. сайына миэхэ биир бастыҥ. Сынньамматахпын сынньанным, ыаммытынан сылаас үүтү да истим, хойуу суораты да аһаатым, отон арааһын да амсайдым, балык амтаннааҕын да боруобалаатым. Тыа дьонун, урукку кылааһынньыктарбын кытта дэлби алтыстым, үлэ бөҕөнү үлэлээтим... Дэриэбинэ олоҕо саха киһитигэр туохтааҕар да ордугун, хамнастаах үлэ баара буоллар онно олохсуйа да барарга бэлэммин биллим.

 

 

 

 хаптаҕас уга

 

ЧАЭС радиациятын бохсооччу Чомчоойоп этэринэн, саха ынаҕын үүтэ олус туһалаах...

 

 эбиэккэ оҕурсуу, шпинат, байтаһын биэ этэ...

 үүттээх чэй иһэ-иһэ Өксөкүлээҕи анаарыахха...

 урукку кинигэлэри хат ороон ааҕыахха...

 

 

 раритет

 

Сир астыы сылдьан тыаҕа эһэ сиэҥигэр (нуучч. падаль) түбэспитим. Киһи этин сааһынан кыыл сылдьыбытын билэр эбит этэ... Дэриэбинэҕэ уонча сүөһүнү, хас эмэ сылгыны туппут эһэни, хата олохтоохтор түргэнник бултаабыттара.

 

 

 

 

 

  сиэҥ (нуучч. падаль)

 

 улахан эһэ... нэһилиэктэн 2-3 км сиртэн бултаабыттара

 

Мин сайыным бу курдук бүтэй Бүлүү биир кыракый нэһилиэгэр ааспыта. Эрэнэбин эһиги сайыҥҥытыгар эмиэ кэрэ-бэлиэ түгэннэр элбэх этилэр диэн.

Аныгыс сайыны кэтэһэ хаалабыт... )))

 

#SummerLife2021

Балаҕан ыйын 30 күнэ 2021 сыл. 

Избранное
  • 30 сентября 2021 г., 21:08
    Бартимеус   Пожаловаться

    ходуһаҕа Кытай эрэ араадьыйата хабар...

    Хата хайаан хабар эбитэ буолла, кытайдар антенналарын күүһэ бэрт буоллаҕа ду)


    Бу сайын биһиэхэ хата тыал хайысхата уларыйан быыс үөскээн күөх халлааны көрөн үөрэн турардаахпын

    Бэртээхэй сурук буолбут🏻

    • Автор
      30 сентября 2021 г., 21:11
      Alaas_uola   Пожаловаться

      Бартимеус, международное радио Китая диэн кэлэр этэ) сыанабылгар махтал. Астык хаартыска

      Чахчы тыал хайысхата уларыйарын кэтэһии бөҕө... Үксүн хотугулуу-илинтэр үрэр буолан буруоҕа олордубут.

  • 1 октября 2021 г., 13:09
    dancer   Пожаловаться

    интересно, но, кто незнает якутский не станут смотреть. это минус аудитории

    • Автор
      1 октября 2021 г., 14:44
      Alaas_uola   Пожаловаться

      dancer, просто хочу чтобы люди не забывали свой язык и общались на своем родном не только дома, но и здесь в сети интернет. тем более в якутском сайте. 

      У нас на законодательном уровне якутский - саха тыла признан государственным языком на территории Республики. Но печально, что где-то 3-5% контента выкладывается на русском языке. Считаю что это крайне возмутимо. 

      • 1 октября 2021 г., 22:20
        Россия24   Пожаловаться

        Alaas_uola, не совсем согласен но в принципе то да, но и русский тоже государственный так что не катит!)).Хотя я думаю много бы людей с удовольствием бы почитало вас и на русском! Очень уж интересный пост!Мне понравился!))Плодотворно и интересно провели лето!

    • Автор
      1 октября 2021 г., 14:59
      Alaas_uola   Пожаловаться

      dancer, на якутском, т.е.

    • 2 октября 2021 г., 07:55
      Аргентинец   Пожаловаться

      dancer, не все обрусели как вы и хотят обрусеть. Есь еще национальное самосознание у нормальных людей.

  • 1 октября 2021 г., 13:18
    Батиста   Пожаловаться

    Наше лето было украдено Айсеном

  • 1 октября 2021 г., 13:54
    Joonas   Пожаловаться

    Бэртээхэй пост буолбут! 🏻

    Биhиэхэ эмиэ былырыын курааннаан, саас хонууга тахсар ууларбыт унту уолан хаалбыттара, ол иhин наар кенускэ, Амма эбэ ырбыытыгар кустаабыппыт. Улахан уердэр олох а5ыйах хонук биллибиттэрэ. Мороду элбээбитин бэлиэтии кербутум. Ол да буоллар сеп буоларбытын ылан дуоhуйа бултаан астынан а5ай кэлбиппит.

    Арыый сололонор киhи эмиэ пост таhаарыллыа этэ

    • Автор
      1 октября 2021 г., 14:40
      Alaas_uola   Пожаловаться

      Joonas, Махтал! Чахчы уһун кураан кэлэн турар. Биһиэхэ Бүлүү эҥэр мороду эмиэ саас да, күһүн да билиннэ. Дьэ хаһан да көрбөтөх куспутун көрөн сөҕүү-махтайыы. Улахан кус эбит, халбаттан обургу.

      Аныгыс саас кус кэлэрин кэтэһии ) 240-ча хонук хаалла...

  • 1 октября 2021 г., 18:38
    Аргентинец   Пожаловаться

    Бэрт, саха киһитэ бэйэтин төрөөбүт тылынан суруйара.

  • 1 октября 2021 г., 22:37
    Stalker194   Пожаловаться

    Должно было называться: "Как я провел этим летом")

  • 2 октября 2021 г., 07:44
    Ape2019   Пожаловаться

    Бу этиини: "Дэриэбинэ олоҕо саха киһитигэр туохтааҕар да ордугун, хамнастаах үлэ баара буоллар онно олохсуйа да барарга бэлэммин биллим".

    Бу олох соп этии билинни уйэгэ!!! Махтал наьаа учугэйдик суруйбуккун, хаартыскаларын учугэйдэрин. Оссо да ыыта тур!!!

    • Автор
      2 октября 2021 г., 12:22
      Alaas_uola   Пожаловаться

      Ape2019, үрдүк сыанабылгар махтанабын

      Соло, иэйии киирдэҕинэ эрэ суруйа сатыыбын. Билигин тыа сиригэр олохсуйуу уустук дьыала буолан турар...

  • 3 октября 2021 г., 19:55
    v445   Пожаловаться

    Автор а где пожары?

  • 11 октября 2021 г., 21:57
    lenke_kepsiir   Пожаловаться

    Уу сахалыы бэккэ суруйбуккун. Инникитин элбэх ситиһиини баҕарабын!

  • 12 октября 2021 г., 07:23
    Уйбаан92   Пожаловаться

    Дьиҥнээх Саханы саха дэтэр киһи Эн бааргын Алгыс🏻

Чтобы оставить комментарий, вам нужно авторизоваться или зарегистрироваться
Читайте также
Включите премодерацию комментариев
Все комментарии к этому посту будут опубликованы только после вашего подтверждения. Подробнее о премодерации
Обратная связь