home
user-header
«Тыа сирэ-омук дьылҕата -- 2» форум үлэтин түмүктээтэ
9 декабря 2019 г., 16:53 108

Бэҕэһээ, ахсынньы 7 күнүгэр, субуотаҕа "Тыа сирэ-омук дьылҕата" форум буолан ааста. Барыта 40-тан тахса киһи сырытта, кэлбит киһи үксэ тыл эттэ, онон мунньах сарсыарда 10-тан киэһэ 18.30 чааска диэри тиргиччи барда.

Мунньахха народнай депутат Сулустаана Мыраан, түөрт араас нэһилиэк баһылыктара, "Баай Ас" потребкооперация салайааччыта Семен Андросов, Амма Эмиһигэр саха ынаҕын иитэн туруорар Николай Кузьмин, Мэҥэ Томторугар сылгы хаһаайыстыбалаах Григорий Васильев, өр сылларга Верхоянскай улууһугар УСХ начальнигынан үлэлээбит Илья Колесов уо.д.а. кыттыыны ыллылар.


Тыа олоҕо сайдарын туһугар ис сүрэхтэриттэн баҕаран туран үлэлии-хамсыы сылдьар дьон мустубут буоланнар бары өттүнэн олус туһалаах кэпсэтии буолла. Дьон туох кэпсэтии тахсыбытын билиэн баҕарарын быһыытынан сорох этиилэри суруйуум.

1. Я.Сивцев, Сулустаана Мыраан: федеральнай былаас нэһилиэктэр дьаһалталарын эһэн уокуруктары тэрийэргэ тииһигирэн эрэр. Бу олохтоох салайыыны симэлитэр кутталлааҕын дьоҥҥо тиэрдиэххэ наада.

2. Саха Кэнгириэһэ тэриллиэҕиттэн тыа сирин боппуруоһугар икки резолюция, түөрт туһаайыы сурук ылыммытыгар олоҕуран тыа хаһаайыстыбатын сайыннарыыга этиилэри оҥорон Ил Дархаҥҥа киллэрэргэ.

3. Нэһилиэктэргэ, улуустарга Сүбэлэри тэрийиини күүскэ көҕүлүүргэ. Бу сүбэлэр аллараттан тэриллэн таҕыстахтарына, тутулуга суох буоллахтарына, олохтоох былааска оппозиционнай буолбатахтарына, туох баар үлэлэрин нэһилиэк (улуус) кэскилигэр туһаайдахтарына көдьүүстээх буолуохтара.

4. Нэһилиэктэр  социальнай экономическай сайдыыларын былааннарын оҥорууну көҕүлээһин. Быйыл сайын үөскээбит быһыы-майгы көрдөрбүтүнэн үгүс нэһилиэк маннык былааны оҥостубакка олорор буолан  таҕыста.

5. Тыа сирин сайдыытын боппуруостарын бары хайысхаларынан (оҥорон таһаарыы, кооперациялааһын, экономика, технология,  социология, энергетика, суол тутуута, педагогика, экология уо.д.а.) комплекснайдык дьарыктанар "Тыа сирин көмүскэлэ" диэн общественнай хамсааһыны тэрийиини көҕүлээһин.

Киирбит этиилэри сүүмэрдээн, сааһылаан, чочуйан мунньах  резолюциятын быһыытынан  бэлэмниир бөлөх талылынна.

  Уйбаан Самаайап

Ахсынньы 8 күнэ, 2019

Избранное
Чтобы оставить комментарий, вам нужно авторизоваться или зарегистрироваться
Включите премодерацию комментариев
Все комментарии к этому посту будут опубликованы только после вашего подтверждения. Подробнее о премодерации
Обратная связь