home
user-header
Саллаат уонна таптал"
ivanshamaev 27 ноября 2021 г., 15:45 60

"Саллаат уонна таптал"

Сомоҕо “Саллаат уонна таптал” диэн сэһэнин ааҕан бүтэрдим. Олус сэргэх, сырдык айымньы. Ааптар тус олоҕор буолан ааспыт дьылҕа быһаарыылаах түгэннэрин кэрэхсэбиллээхтик сэһэргээбит. Ааптар бэйэтин маҥнайгы тапталын хайдах көрсүбүтүн, уоллаах кыыс хайдах билсибиттэрин киһи таттаран ааҕарын курдук ойуулуур.

Биллэн турар, сэһэн уус-уран айымньы. Ол гынан баран бу айымньы "сирэй сэһэн" жанрынан суруллубут. Ааптар бэйэтэ билинэринэн кэпсээн персонажтара, сүрүн геройтан (Эрчим) ураты, бэйэлэрин дьиҥнээх ааттарынан киирэ сылдьаллар, кинилэр тустарынан дьиҥнээх буолбут түбэлтэлэр ойууланаллар. Ол аата бу сэһэн оччотооҕу кэм быһыытын-майгытын туоһулуур докумуон суолталаах. Кэлэр кэм ааҕааччыта сирэй сэһэҥҥэ, сирэй кэпсээҥҥэ ураты сыана биэриэн сөп диэн сабаҕалыыбын.

Бу сэһэн өссө биир документальнай сыаннаһа - Чукоткаҕа турбут сэбиэскэй байыаннай чаастар туһунан кэпсиирэ. Сэһэн иккис документальнай сыаннаһа - саха саллааттара бэйэ бэйэлэригэр убай-быраат курдук сыһыаннарын, хардарыта өйөһүүлэрин туһунан уус-уран туоһу буолара.

Эрчим армияҕа сырыттаҕына таптыыр кыыһа атын киһиэхэ кэргэн тахсан хаалар. Уол төһө да дойдутуттан, дьонуттан-сэргэтиттэн ыраах тэлэһийэн сырыттар уруу-аймах курдук санаһар доҕоттордоох буолан ылбыт охсуутун аһарынар, кэскилгэ эрэлин сүтэрбэт.

Сэһэн дьиктитик түмүктэнэр. Эрчим командировкаҕа сылдьан биллиилээх чукча муосчутун мастарыскыайыгар тиийэ сылдьар. Муосчут оҕонньор муосчут эрэ буолбатах, айылҕалаах киһи эбит. Кини Эрчими атаҕын тилэҕиттэн кэтэҕэр диэри бигээн көрөн баран дууһата улахан сүтүктээх сылдьарын эндэппэккэ быһаарар уонна "тапталгын булуоҥ, элбэх ыччаттаныаҥ" диэн инникитин барҕалаан биэрэн уолга күүстээх эрэл уотун саҕар.

Бу үчүгэй баҕайы кинигэни элбэх киһи булан ааҕа сылдьара буолуо дии санаабаппын. Биһиги үчүгэйи биллэрэр, дьоҥҥо тиэрдэр хардьаларбыт бүтэйэ оһон турар кэмигэр олоробут. Мин Бичик-Айар рекламалыыр отделын сэмэлээн этэр буолбатахпын - олохпут оннук буолла, аны биһиги онно бэринэн олорон биэрээри гынныбыт!

Дьэ доҕоттор, "Ааҕар Саха сирэ" хамсааһыны сирэйдээн тэрийэр наадатын өйдүүр кэм кэллэ. Ол “Ааҕар Саха сирэ” диэн сахалыы туох үчүгэй сурук-бичик тахсыбытын туһунан сонуну, билиини тарҕатар тиһик курдук өйдүөххэ. Ону тэрийэр толору кыахтаахпыт эрээри биир хардыыны оҥорбокко олоробут.

Уйбаан Самаайап.2021, сэтинньи 26 күнэ.Тарҕатар көҥүллэнэрин ааһан биһирэнэр.

Избранное
Чтобы оставить комментарий, вам нужно авторизоваться или зарегистрироваться
Включите премодерацию комментариев
Все комментарии к этому посту будут опубликованы только после вашего подтверждения. Подробнее о премодерации
Обратная связь