home
user-header

                        
                        
Суол суугунугар сууламмыт хонуктарым
s_sandar 22 ноября 2021 г., 17:14 в Rulez! - Стихи 64

Суол суугунугар сууламмыт хонуктарым

Уон уубун ыган, уора-көстө аастылар.

Тыал тыллыыта тыргыллыбыт ыллыктарым

Тыҥ хатыыта алааспыттан арахтылар.

 


Хаар дьабакалаах хара хаайыы хайаларым

Халлааҥҥа талаһа, түүлбүн-биппин күөйдүлэр.

Таас араҥалаах айаным аартыктарын

Үрүмэ түүннэрим эрийэ-буруйа өрдүлэр.

 

Хаан суунуулаах ыраах ыырдаах саҕахтарым

Хаам да хаамыма – чугас буолбат тустаахтар.

"Хаал" дииллэрин хаһан эрэ ахтарым.

Хаар хардыытын ол оннугар наар аахтар.

***

Бу хоһоону Магадантан кэлэн баран суруйбутум. Бу дойдуга сыһыаным элбэх. Ол эрэн кини таастаах, харах уутуттан туустаах буоругар үктэнэр күнүм 2020 с. дьэ үүммүтэ.

"Маҕан Аан" диэн хоһоон бөлөҕүн суруйан бүтэрэрим буоллар дьоллонуом этэ. 

Сэмэн Тумат бу хоһоон маҥнайгы строкатынан ("Суол суугунугар сууламмыт хонуктарым") иккис хомуурунньуккун ааттаар диэн сүбэлээбитэ. Көрүөхпүт.

"Чолбон" уус-уран сурунаал ааспыт (алтынньы дуу, сэтинньи дуу ыйдааҕы) тахсыытыгар бу хоһоон мин тиһикпин аспыттаах. Онон бэчээккэ киирэр бочуокка киирбит хоһоон эһиги иннигитигэр тэлгэнэ сыттаҕа буоллун. 

 

***

Хос эһэм сиэнэ буолаарыбын, санаа эрэ буолларбын, соло эрэ булларбын - сыныйан ыллыы сылдьар дьоллоох сахабын. 

Онон ырыа буолбут тиэкистэр эмиэ бааллар. Бэйэм биирдэ ыллаат быраҕабын, умнабын. Ким эмит ылан дьиҥнээх ырыа оҥостон, тыын иҥэрэн, кынаттаан, куйаарга көтүтэрэ буоллар - үөрүүнү кытта үллэстиэм этэ. Онон этиим маннык: ким эмит бэлэм ырыаҕа (текст + мелодия), ырыа тылыгар (текст) наадыйар буоллаҕына, хайдах эрэ булан миэхэ суруйуоххутун сөп (комментарийдарга, пейджерга, о.д.а.). Тулаайах хоһооннор бааллар аҕай. 

 

Избранное
Чтобы оставить комментарий, вам нужно авторизоваться или зарегистрироваться
Включите премодерацию комментариев
Все комментарии к этому посту будут опубликованы только после вашего подтверждения. Подробнее о премодерации
Обратная связь